අමතක වූ ආදරය

වසර ගණනක් තැනුව කූඩුව
තිබෙයි තවමත් හුදෙකලාවම
කූඩුවේ දොර තවම එලෙසම
ඇරෙන්නේ නුඹ පැමිණි විගසම

මතකයේ ඇත නුඹ සමග මා
දෙපස හිදගෙන පන්සලේ බිම
ගෙතූ මල්දම් කියූ නෙක බස්
නුඹට අමතක වී ඇතත් අද

ගෙයින් ගෙට ගොස් පඩුරු එක්කොට
සැදුව කූඩුවෙ පාට මතකද
වෙසක් දිනයේ සදුගෙ එළියෙන්
පහන් දැල්වුවා නුඹට මතකද

පාසලේ එක පන්තියේ අපි
අකුරු කෙරුවා නුඹට මතකද
පන්තියේ නුඹ මාව පරදා
පළමු තැන නිති ගත්තා මතකද

සැමට හොරැහින් නුඹම සැමදා
මගේ පසුපස ආව මතකද
හදවතින් මුත් නුඹට මා කළ
ආලෙවත් දැන් නුඹට මතකද